Япон улсын дархлаажуулалтын үзүүлэлт нь "Их Долоо"-г тэргүүллээ

Хүн амынхаа 75.7 хувийг коронавирусийн эсрэг вакцины хос тунд хамруулсан үзүүлэлтээр Япон улс Их Долоогийн гишүүн орнуудыг тэргүүлж байгааг тус улсын засгийн газраас мэдээлжээ. 125 сая орчим хүн амтай Япон улсад сүүлийн өдрүүдэд коронавирусийн халдварын тохиолдол эрчимтэй буурч байгаа юм. Сүүлийн нэг хоногийн хугацаанд тус улс даяар халдварын 163 тохиолдол шинээр бүртгэгдсэн байна. Энэ оны наймдугаар сард өдөрт 25,000 гаруй тохиолдол бүртгэгдэж байсантай харьцуулбал энэ нь огцом бууралт юм. Covid-19 өвчний хүндрэлээр эмнэлэгт хэвтсэн хүний тоо сүүлийн хоногт 76 бүртгэгджээ. Вакцины зөвхөн эхний тунгаа тариулсан хүмүүсийг оролцуулж тооцвол нийт хамрагдсан хүний тоо 99.4 сая буюу нийт хүн амын 78.5 хувь болж байна. Япон улсын засгийн газар иргэдээ вакцины нэмэлт буюу гурав дахь тунд хамруулах ажлыг ирэх сараас эхлүүлэхээр төлөвлөж байна. Эх сурвалж: Kyodo News