Хорт хавдрын улмаас хоногт дунджаар 12 хүн нас барж байна

Дөрвөн жилийн өмнө хорт хавдраар өвчилсөн хүний тоо жилдээ 5 мянгад хүрч, нас баралт хоногтоо 6-7 бүртгэгддэг байсан. Эрдэмтдийн тооцооллоор 2040 он гэхэд хорт хавдраар өвчлөх хүний тоо 2 дахин өсөх тооцооллыг гаргаж байжээ. Гэтэл өнөөдөр энэ тоотой эн зэрэгцэх түвшинд хэдийнэ хүрчээ. Хорт хавдраар өвчилсөн хүмүүсийн дийлэнх нь эцсийн шатандаа орсон үедээ мэддэг. Эрт илрүүлж чадвал эмчлэгдэх бүрэн боломжтой юм. Манай улсад бүртгэгддэг хавдрын дийлэнхийг элэгний болон ходоод, улаан хоолойн хорт хавдар эзэлдэг юм. Иргэдийн эрүүл мэндийн боловсролын мэдлэгийг дээшлүүлж чадвал чимээгүй тахлаар хорвоог орхих эрсдлээс бид хамгаалж чадна. Хавдрын эрт үеийн илрүүлэг дунджаар 30%-тай байдаг. Уг нь энэ тоон үзүүлэлт 70%-д хүрч чадвал аюулт өвчнөөс сэргийлэх бүрэн боломжтой юм.