Ш.Алтантуяаг хөнөөсөн цагдаагийн цаазаар авах ял хөнгөрүүлж, жанчих ялаар сольжээ

Малайзийн дээд шүүх Монгол Улсын иргэн Ш.Алтантуяагийн амь насыг хөнөөсөн хэргээр цаазын ял аваад байсан цагдаагийн алба хаагч асан Азилах Хадригийн ялын дээд хэмжээг 40 жил хорих ял, 12 удаа саваагаар жанчих ялаар сольсон тухай түүний өмгөөлөгч мэдээлсэн тухай Ройтерс агентлаг дамжуулжээ.

Шүүхийн энэхүү шийдвэр нь Малайз улс өнгөрсөн онд цаазын ялыг цуцалсантай холбоотой гаргажээ.

Азилах Хадри гэгч нь 2006 онд 28 настай загвар өмсөгч, Малайзын Ерөнхий сайд асан Нажиб Разакийн туслахын орчуулагчаар ажиллаж байсан Шарийбуугийн Алтантуяагийн амь насыг хөнөөсөн хэргээр цаазын ял авсан юм. Ингэхдээ 40 жилийн хорих ялыг Азилахын баривчлагдсан 2006 оны арваннэгдүгээр сараас эхлэн тооцох гэнэ.

Хохирогчийн эцэг Сэтэвийн Шаарийбуу тус улсын шүүхэд хандан "Цагдаагийн алба хаагч асан амьдрах эрхтэй" хэмээн захидал бичсэнийг Азилахын өмгөөлөгч шүүх хуралд танилцуулснаар шүүгчид шийдвэр гаргаж, ийнхүү ялыг хөнгөрүүлсэн байна. 

С.Шаарийбуугийн захидлыг Ройтерс агентлагийн сурвалжлагч харж, танилцсан тухай тус агентлаг дурдаад хохирогчийн гэр бүлийн өмгөөлөгч Сангит Каур Део мөн захидал жинхэнэ болохыг баталжээ.