Засгийн газрын халамж, хөнгөлөлт дуусах үед иргэд юу хийх вэ?

Цар тахлын үед иргэдэд учрах эдийн засгийн хүндрэлийг бууруулах зорилгоор Засгийн газраас тодорхой хэд хэдэн арга хэмжээг авсан. Тухайлбал,

• Энэ оны эцэс хүртэл иргэдийн эрчим хүч, дулаан, ус, хогний төлбөрийг тэглэсэн;
• Орон сууцны ипотекийн зээлтэй 55,676 иргэдийн зээлийн эргэн төлөлтийг хүү хуримтлуулж тооцохгүйгээр, хойшлуулсан;
• Зарим ААН-ийн цахилгаан, дулаан, дулааны уур, усан хангамж, хогний төлбөрийг тэглэсэн;
• Шахмал түлшний үнийг 75%-иар бууруулсан;
• Хүүхдийн мөнгөн тэтгэмжийг 100 мянган төгрөг болгосон.

“Хог, дулаан, цахилгааны үнийн хөнгөлөлтийг ирэх оны нэгдүгээр сарын 1-нээс үзүүлэхгүй. Хүүхдийн мөнгийг ирэх оны эхний зургаан сард энэ хэвээр нь үргэлжлүүлнэ.”

Гэхдээ энэ бол энэ оны эцсийг хүртэл үргэлжлэх хөнгөлөлтүүд юм. Энэ мэт төрөөс хэрэгжүүлж буй хөнгөлөлт, халамжууд товлосон хугацаандаа зогсон, тоо хэмжээ нь буурна. Энэ үед иргэд чухам ямар бэлтгэлтэй байх хэрэгтэй талаарх зөвлөгөөг Хувийн санхүүгийн зөвлөх Г. Мөнгөн өгчээ. Тэрбээр, “Оны эцэс гэхэд иргэд маань сар болгон төлөөгүй байх хугацааныхаа төлбөрийг төлж байна гэж бодоод хуримтлуулаад байх хэрэгтэй. Тэгэхээр энэ нь өр, зээлээсээ түрүүлж алх гэдэг систем л гэсэн үг. Өнөөдөр зээлийн төлбөр нь боллоо гэхэд шууд цалингаасаа аваад өгдөг биш, өнөөдөр танд хөнгөлөлттэй нөхцөл үүссэн байгаа үед ажил олж хийх, орлоготой байх хэрэгтэй.” Энэхүү эдийн засгийн хүндрэлтэй цаг мөчийг дэлхийн олон орнууд даван туулж байна. Өнөөдрийн энэ хямрал нь 2008-2009 оны санхүү, эдийн засгийн хямралаас илүү гүн, 1930-аад оны үеийн хямралаас хойших эдийн засгийн хамгийн том хүндрэл байж болзошгүйг мэргэжилтнүүд онцолж байгаа юм.  

Б. Амина