Иргэн Д.Монголхүү: Хэргийн талаар мэдээлэл өгүүлэхгүй гэж баталгаа гаргуулж хууль, эрх мэдэлдээ дульдуудаж амыг минь үдэж байгаад дураараа бурцгааж байна

"NoDoubleStandard" иргэдийн хөдөлгөөний зохицуулагч  Д.Монголхүү хууль бус жагсаал цуглаан зохион байгуулсан, цагдаагийн алба хаагчийн тавьсан шаардлагыг эсэргүүцэж биед нь халдсан хэмээн шуугиан тарьсан. Энэ хэргийг шалгахаар Сүхбаатар дүүргийн цагдаагийн нэгдүгээр хэлтэс рүү түүнийг авч явсан билээ. Иргэн Д.Монголхүүгийн хувьд  гурван удаагийн зөрчлийн хэрэг дээр шалгагдаж байгаа бөгөөд Аравдугаар сарын 5-ны өдөр түүнд эрүүгийн хэрэг үүсгэсэн. Түүнчлэн энэ асуудлаар Улсын их хурал дахь хүний эрхийн дэд хороо хуралдсан бөгөөд, Хүний эрхийн комиссийн гишүүн Нарантуяа: “Жагсаал цуглаантай холбоотой үүсээд байгаа асуудлуудын гол шалтгааныг, жагсаал цуглаан зохион байгуулах журмын тухай хууль болон ковидтой холбоотой бусад шинэ хууль журмууд нь хүний үндсэн эрхүүдийг зөрчсөнтэй холбоотой гэж үзсэн”. Харин Улсын их хурлын гишүүн Ц. Сандаг-очир: “Үндсэн хуулиар олгогдсон үзэл бодлоо илэрхийлэх, итгэл үнэмшилтэй байх, жагсаж цуглах эрх хангалттай байгаа гэдгийг сүүлийн 2 жилд зохион байгуулагдсан олон жагсаал цуглаан харуулж байна”гэлээ. "NoDoubleStandard" иргэдийн хөдөлгөөний зүгээс Засгийн газарт: Covid-19-өөр нас барсан иргэдийн ар гэрийн өмнө хариуцлага хүлээж огцрох Covid-19 халдварт төрөөс зарцуулж буй төсвийг олон нийтэд нээлттэй харуулах Удаа дараагийн хязгаарлалт тогтоохгүй байх зэрэг шаардлагуудыг хүргүүлсэн юм. Тэгвэл өнөөдөр Иргэн Д.Монголхүү: “Хэргийн талаар мэдээлэл өгүүлэхгүй гэж баталгаа гаргуулж хууль, эрх мэдэлдээ дульдуудаж амыг минь үдэж байгаад дураараа бурцгааж байна. Энэ хуулийн хэрэгжилт чинь мөнх үргэлжлэхгүй шүү дээ “  хэмээн өөрийн цахим хуудсанд нийтлэсэн байна.

Б.Эрдэнэзаяа