Н.Учрал: Жагсаал цуглаан хийх зөвшөөрлийг Засаг дарга олгодог тогтолцоо байж болохгүй

Өнөөдөр буюу арван нэгдүгээр сарын 8-ны өдөр УИХ-ын гишүүн Н.Учрал “Жагсаал, цуглаан хийх журмын тухай хууль”-д өөрчлөлт оруулах хуулийн төслийг боловсруулж, Засгийн газарт хүргүүллээ. Энэ хуулийн талаар мэдээлэл хийхдээ тэрбээр хуульд өөрчлөлт оруулах шаардлагатай болохыг онцлов. Тэрбээр, "Жагсаал цуглаан хийх журмын тухай хуульд 2018 онд нэмэлт өөрчлөлт оруулсан. Уг хуулийг журамлах цаг ирлээ. Ингэснээр иргэд жагсаал цуглаан хийх хүсэлтээ тухайн дүүргийн Засаг даргад мэдүүлж бүртгүүлнэ. Олон улсын туршлагаас харахад ч жагсаал цуглаан хийхээс өмнө бүртгүүлдэг юм. Иргэд хэзээ ч ямар ч цаг үед итгэл үнэмшил, үзэл бодлоо  илэрхийлэх эрхийг нь нээлттэй орхих ёстой. Бид 1992 онд батлагдсан Үндсэн хуулиар олж авсан эрх чөлөөгөө эдлэхгүй бол хувь хүний эрх чөлөө рүү халдсан хуулийн төслийг зарим УИХ-ын гишүүн баталж байна. Өнөөдөр МАН-ын бүлэгт ч Жагсаал цуглаан хийх журмын тухай хуульд өөрчлөлт оруулах ёстой гэсэн байр суурьтай байгаа. Тэгэхээр иргэдэд жагсаал цуглаан хийх эрхийг нь илүү  нээлттэй болгож өг" гэлээ. Иргэд өөр хоорондоо эвлэлдэн нэгдэж, жагсаал цуглаан хийн үзэл бодлоо илэрхийлэхдээ заавал зөвшөөрөл авдаг. Ингэхдээ тухайн нутаг дэвсгэрийн Засаг даргад мэдэгдэл хүргүүлж, бүртгүүлдэг. Тухайн зохион байгуулах жагсаал цуглаан нь “таалагдахгүй” бол Засаг дарга татгалзаж, зөвшөөрөл олгохгүй байж болно. Үүнээс үүдэн иргэд, цагдаагийн албан хаагчийн хооронд үл ойлголцол үүсдэг.

Б.Амина