Шинэчилсэн хуулиар хөдөлмөрийн маргааныг хурдан шийдэх боломжтой боллоо

Хөдөлмөрийн тухай шинэчилсэн хууль энэ оны эхнээс хүчин төгөлдөр хэрэгжиж эхэлж байгаа . Хуульд орсон нэг шинэчлэл нь хөдөлмөрийн маргааныг хурдан шийдэх эрхзүй бүрдэж байгаатай нягт холбоотой. Тодруулбал, хуулиар 20 ба түүнээс дээш ажилтантай ААН, байгууллага бүр өмчийн хэлбэр үл харгалзан хөдөлмөрийн маргааныг таслах орон тооны бус, байнгын ажиллагаатай комисс байгуулан ажиллах юм. Харин 15-аас доош ажилтантай байгууллага сум, дүүргийн хөдөлмөрийн эрхийн маргаан зохицуулах хороонд хандах боломжтой болж байгаа аж.

Хөдөлмөрийн харилцаанд гарсан аливаа маргааныг тухайн комисс 10 хоногийн дотор шийдвэрлэх юм.  Түүнчлэн хөдөлмөрийн харилцаатай холбоотой маргаан, үйл явцыг аль болох хурдан хугацаанд, бага зардлаар шийдэх боломжтой болж байгаа талаар  ХНХЯ-ны Хөдөлмөрийн харилцаа, цалин хөлс, хууль тогтоомж хариуцсан хэлтсийн ахлах шинжээч Ш.Маяа онцоллоо.