Бяцхан ертөнц: Дэлхийн дулаарлын тухай хичээл дээрээ сонссон бяцхан сурагчын бүтээл

         Дорнод аймгийн авьяаслаг бяцхан сурагч Т. Ангирам зураг зурах дуртай. Түүний зургуудад дэлхийн дулаарал, цөлжилт, ногоон дэлхийн зургууд байх бөгөөд анх 1 нас хүрээгүй байх үеэсээ л зураг зурж эхэлжээ. Зургаараа юуг илэрхийлсэн тухай ээж нь асуухад Ангирам "Томчууд дэлхийгээ хайрлахгүй байснаас болоод пингвин амьдардаг мөс хайлсан. Хөөрхий найзтайгаа тоглох том мөсгүй болсон байхөө" гэжээ.

         Хөгжил гэх технологийн дэвшил нь эргээд шавхагдах нөөцтэй эх дэлхийд хор уршиг болж ан амьтдын амьдрах орчин хумигдаж байгаа үед шинэ мянганы хүүхдүүд харж, дүрсэлж буй зүйлсээрээ томчууд бидэнд юу хүсэж байгаагаа илэрхийлэх мэт.

          2021 оны 9 сард Нью-Йорк хотноо зохион байгуулагдсан НҮБ-ын Ерөнхий ассамблейн дэлхийн дээд хэмжээний нээлтийн үеэр Антонио Гутерриш “ДЭЛХИЙН ДУЛААРАЛ АЮУЛЫН ХАРАНГА ДЭЛДЛЭЭ” гэж мэдэгдэж байв. Хүний үйл ажиллагааны улмаас дэлхийн уур амьсгал эргэлт буцалтгүйгээр дулаарсан. Хүн төрөлхтөн нүүрс, газрын тос болон бусад түлшийг шатааж эхэлснээр 1750 оноос дэлхийн агаар мандалд ялгарах нүүрстөрөгчийн давхар ислийн хэмжээ тасралтгүй нэмэгдэж өнөөдөр үр нөлөө нь дэлхийн бүх бүс нутагт мэдрэгдэж байна.