Хятад улс шаардлага гарвал Старлинкийн хиймэл дагуулуудыг устгах чадвартай байх ёстой гэжээ

Илон Маскийн Старлинк үйлчилгээний хиймэл дагуулуудыг Хятад улсын зэвсэгт хүчин шаардлагатай тохиолдолд устгах, ажиллагаагүй болгох чадвартай байх хэрэгтэйг тус улсын батлан хамгаалах салбарын эрдэмтэн судлаачид бичжээ. “Modern Defence Technology” сэтгүүлд ийм санаа бүхий судалгааны өгүүллийг Хятадын эрдэмтэд нийтлүүлсэн тухай Өрнөдийн хэд хэдэн хэвлэл мэдээлсэн байна. Судалгааг Хятадын Ардын Чөлөөлөх Армийн дэргэдэх Бээжин хотын Харилцаа Холбоо, Ажиглалт Хяналтын Хүрээлэнгийн эрдэмтэн Рэн Юаньжэн ахалжээ. “Старлинкийн хиймэл дагуулуудын ажиллагааг тасалдуулах, үйлдлийн системийг нь зөөлөн болон хатуу арга замаар устгах чадварыг эзэмших шаардлагатай” гэж уг судалгааны тайланд бичсэн байна. Америкийн тэрбумтан Илон Маскийн SpaceX компани нам өндрийн тойрог замд 2,400 гаруй хиймэл дагуул бүхий Старлинк системийг бүтээгээд байгаа нь өндөр хурдны интернэт үйлчилгээг дэлхийн өнцөг булан бүрд үзүүлэх зорилготой юм. Хэдийгээр энэ төсөл иргэний зориулалттай гэгдэж байгаа ч цэрэг дайны зориулалтаар ашиглагдах боломжтой тул "үндэсний аюулгүй байдалд нь заналхийлнэ" гэж Хятадын судлаачид үзэж байгаа ажээ. Тухайлбал өнөөдөр Украины зэвсэгт хүчин Старлинкийн терминалуудыг ийм зорилгоор ашиглаж, дрон, нисэх онгоц, их бууны цохилтыг чиглүүлж байгаа гэж үздэг байна.   Эх сурвалж: www.ikon.mn