Тужийн нарсны 15 мянган га талбайг ойжуулжээ

Сэлэнгэ аймгийн Ерөө суманд газар тариалан эрхэлдэг “Доолт” ХХК тус газарт 2,624 га эргэлтийн талбайтай, жилд дунджаар 1,400-1,900 га талбайд улаанбуудайн тариалж, нэг га талбайгаас 15-32 цн ургац хураан авдаг байна. Сэлэнгэ аймгийн Ерөө сум тариалангийн 24 мянга орчим га эргэлтийн талбайтай. Ойн зурвас байгуулахаас гадна мал орохоос сэргийлж нийт талбайн 30 хувийг хашаажуулаад байна. Мөн тус аймгийн Алтанбулаг сумын нутаг дэвсгэрт байх “Тужийн нарс” байгалийн цогцолборт газрын ойжуулалт, нөхөн сэргээлт хийгдэж байна.  Тужийн нарсыг экосистемийнх нь хувьд иж бүрэн цогцолбороор нь нөхөн сэргээх зорилгоор 2002 онд Улсын Их Хурлын 39 дүгээр тогтоолоор улсын хамгаалалтад авсан. Одоогоор цогцолборт газрын 15 мянга га талбайг бүрэн ойжуулсан байна. Ой, хээрийн түймэр, хортон шавжнаас хамгаалах, мэргэжилтэй боловсон хүчин бэлтгэх, тарьц, суулгацаа бэлтгэхэд онцгой анхаарч байгааг тус аймгийн удирдлага онцолжээ. Түүнчлэн, “Тэрбум мод” үндэсний хөдөлгөөний хүрээнд 20 сая мод тарьж, ургуулахын зэрэгцээ тарьц, суулгац нийлүүлэгч аймаг болох зорилт тавьсан. Одоогоор есөн аймаг тарьц, суулгац авах хүсэлтээ ирүүлээд байгаа аж.