"Гоожингийн өндөр"-ийг нийслэлийн хамгаалалтад авах захирамж гарчээ

Богд хаант Монгол Улсын анхны Ерөнхий сайд Сайн ноён хан Т.Намнансүрэнгийн 1914 онд бариулж, амьдарч байсан "Гоожингийн өндөр" хэмээх барилгыг хамгаалалтад авах тухай Нийслэлийн Засаг дарга бөгөөд Улаанбаатар хотын захирагч Д.Сумъяабазарын захирамж өчигдөр гарсан байна. Эл захирамжтай холбогдуулан Нийслэлийн Засаг даргын Тамгын газрын хэвлэлийн төлөөлөгч Н.Сугар, Нийслэлийн Засаг даргын ахлах зөвлөх Д.Мөнх-Эрдэнэ нар мэдээлэл өглөө. Тэрбээр, Захирамжаар, түүх соёлын үл хөдлөх дурсгал болох Баянзүрх дүүргийн 6 дугаар хорооны нутагт орших, хоёр давхар, "Гоожингийн өндөр" гэх барилгыг эвдэх, гэмтэх, устахаас сэргийлэх зорилгоор цагдаагийн хамгаалалтад авахыг НЦУГ-ын дарга Р.Отгонжаргалд үүрэг болгосон. Барилгын анхны хэлбэр, хийцийг алдагдуулахгүй сэргээн засах ажлыг 2022 оны дөрөвдүгээр улиралд багтаахыг Нийслэлийн Соёл урлагийн газрын дарга Ж.Дамдинцэрэнд даалгаж, барилгыг мөн хугацаанд багтаж музейн чиглэлээр ажиллуулахыг Улаанбаатар хотын музейд, бичил цэцэрлэгт хүрээлэн байгуулахыг Нийслэлийн Захирагчийн ажлын албанд даалгасан гэв. Түүнчлэн  хууль зөрчиж тухайн барилгын газрыг иргэний өмчлөлд шилжүүлсэн асуудлыг судалж, хуулийн байгууллагаар шалгуулж, холбогдох шийдвэрийг хүчингүй болгохыг НЗДТГ-ын Хууль, эрх зүйн хэлтэст үүрэг болгоод байгаа юм.