Цус ойртолт үндэсний аюулгүй байдалд нөлөөлнө

Хүний цусан төрлийн хамаарал үеэс үед 2 дахин буурч явсаар 9 дэх үе дээрээ холддог. Өөрөөр хэлбэл үүнээс цааш садан төрөл биш гэж үзнэ. Гэтэл өнөөдөр Монголчууд 4 дэх үе дээрээ ураг барилдаж цус ойртох тохиолдол их байгааг судлаачид хэлжээ. Цус ойртолтоос болж олон сөрөг үр дагавар гарч байна. Тухайлбал, оюуны хомсдолтой хүний тоо нэмэгдэж байгаа шалтгааны 50% нь цус ойртолттой холбоотой гэсэн судалгаа байна. Олон улсад 1000 хүн тутамд оюуны хомсдолтой 10 хүн байвал хэвийн гэж үздэг.

Манай улсад 10 жил тутамд 3-аар нэмэгдэж, 1000 хүн тутамд оюуны хомсдолтой 13 хүн амьдарч байна.

Монгол хүний удмын сан доройтоход нөлөөлж буй бас нэгэн шалтгаан бол залуус төрж өссөн газраасаа хань ижлээ сонгодогтой холбоотой. Манай улсад жилд дунджаар 20 мянган хос гэрлэлтээ батлуулж байгаа юм. Тэдний дийлэнх нь аймаг, сум, баг дотроо гэр бүл болдог гэсэн судалгаа гарчээ. Холоос бэр буулгадаг Монгол уламжлал бүдгэрч буйг түүхчид сануулсаар байна.