Б.Бадамцэцэг: Төр өөрөө хөгжлийн бэрхшээлтэй, бие муутай хүүхдүүдийг ялгаварлан гадуурхаж байгаа тул НҮБ-д гомдол гаргаж байна

Хүнсний аюулгүй байдлын асуудал хөндөгдсөн эдгээр өдрүүдэд хорт хавдраар өвдсөн охины ээж Б. Бадамцэцэг Нэгдсэн Үндэсний Байгууллага(НҮБ)-д албан ёсоор гомдол гаргах болсон талаар өнөөдөр мэдээлэл хийлээ. Б.Бадамцэцэг: "Миний охин одоо сэхээн амьдруулах тасагт хэвтэж байгаа. Хүүхдийн маань тархинд үхжилт явагдсан гэдгийг эмч нар хэлсэн. Тиймээс ч асар олон газраар явсан ч хүлээж авдаг хүн алга. Монголд миний охинтой адил өвчтэй 11,000 гаруй хүүхдийн эрх ашиг хөндөгдөөд байна. Өнөөдөр 11,000 ээж нулимсаа урсгаж, төрийн удирдлагууд, сайд, дарга нартай уулзахад “Судалж үзье, бодъё, ярья” гэдэг хариуг л өгдөг. "Судалж, бодож үзнэ" гэдэг үгийн чинь цаана хэдэн хүүхэд харамсалтайгаар амь насаа алдаж байна вэ. Би дахиад хэзээ ч уйлахгүй. Яагаад гэвэл намайг төр өөрөө ингэж хатуужуулж байна. Урьд нь их зүйлд гомдож, нулимс асгаруулдаг байсан. Яагаад хичээж амьдраад байхад болдоггүй юм бэ. Иргэний төлөө хууль манайд огт алга" хэмээн хэллээ.  "Хүүхдийн эрхийг хамгаалах өдөр (өчигдөр) ч би талбай дээр хандив цуглуулаад зогссон. Намайг талбай дээр хандив цуглуулж 20 гаруй хоног зогсоход төрөөс төсөв урсгаж, тэр их хэмжээний мөнгөөр хиймэл зүлэг дэвссэн, тайз зассан. Тэр тайзан дээрээ гараад “Хүүхдүүдээ нэгдүгээрт тавина” гэдэг үгийг л сайд нар хэлсэн. Төр өөрөө хөгжлийн бэрхшээлтэй болон бие муутай хүүхдүүдийг ялгаварлан гадуурхаж байна. Тийм учраас НҮБ-д албан ёсоор гомдол гаргахаар ээжүүдийн гарын үсэг, өргөдөл гомдлыг газар бүхнээс цуглуулсан. НҮБ-д хандъя гэхэд "Чиний үгийг хэн авдаг юм бэ" гэж тоомсоргүй хандах байдал ч үүсэж байгаа. Өнөөдөр хүүхдүүдэд тоглох талбай ч алга. Тоглох талбайгүй учраас гэртээ үлдээд цонхноос унаж амиа алдсан харамсалтай явдал ч гарч байна. Гэр хороололд хүүхдүүд шатаж нас барж байна. Ээж аав нь ажил хиймээр байна, тэр хүүхдүүдэд өдөр өнжүүлэх байхгүй" гэв.